Крест
Радуйтесь, ибо Господь грядет судить
Вселенская Проповедь Вечного Евангелия. Сайт отца Олега Моленко - omolenko.com
  tolkovanie.com  
Rus
  omolenko.com  
Eng
  propovedi.com  
  Кредо Переписка Календарь Устав Аудио
  Имя Божие 3000 вопросов Богослужения Школа Видео
  Библиотека Проповеди Тайна ап.Иоанна Поэзия Фото
  Публицистика Дискуссии Эра Духа Святого История Фотокниги
  Апостасия РПЦ МП Свидетельства Иконы Стихи о.Олега Стримы
  Жития святых Книги о.Олега Исповедь Библия Избранное
  Молитвы Слово батюшки Новомученики Пожертвования Контакты
Главная страница сайта Печать страницы Ответ на вопрос Пожертвования YouTube канал отца Олега Вниз страницы Вверх страницы К предыдущей странице   К вышестоящей странице   К следующей странице Перевод
YouTube канал отца Олега   Facebook страничка   YouTube канал проповедей отца Олега  


ВКонтакт Facebook Twitter Blogger Livejournal Mail.Ru Liveinternet

Акафист преподобной Алипии, новой угоднице Божией и дивной чудотворице



Преподобная матушка Алипия

Кондак 1

Избранная от богоспасаемаго народа мордовскаго, земли Пензенския славное прозябение, родителей благочестивых дщерь честная, во святый град Киев, избранный Царицей Небесной во удел Себе, из плена пришедшая и великий подвиг Христа ради юродства на ся восприимшая; величая подвиги, труды и молитвы твоя, воспеваем ти хваления таковая: Радуйся, блаженная мати наша Алипие, на пажити Богоматери подвиги своя добре совершившая.

Икос 1

Ангелов Творец избра тя от лет детских, да послужиши делу спасения душ людских, преизобильно излия на тя благодать Духа Святаго, да будеши болящим и скорбящим, гонимым и теснимым утешением и наставлением, врачом скорым и безмездным. За сии труды и молитвы твоя радостно с благоговением глаголем ти сицевая: Радуйся, образе любве, веры и благочестия; Радуйся, кротость, смирение и терпение стяжавшая; Радуйся, скорбным утешение; Радуйся, болящим исцеление; Радуйся, гонимым правды ради защищение; Радуйся, немощных подкрепление; Радуйся, заблуждших вразумление; Радуйся, нищих духом питательнице; Радуйся, блаженная мати наша Алипие, на пажити Богоматери подвиги своя добре совершившая.

Кондак 2

Видяще мати твоя, благочестивая Васса, велию любовь твою к нищим и неимущим, посылаше тя в домы их, разносити милостыни и трапезы праздничныя на столы их. Ты же еще сущи лет малых добре сие в сердце своем слагала еси, воспевая издетска Богу красную песнь: Аллилуиа.

Икос 2

Разум небесный свыше тебе даровася, Божия избраннице, издетска помышляла еси о небеснем и с любовию храм Божий посещала еси и вельми скорбела о нечтущих день седьмый. Мы же, видяще раннюю любовь твою ко Господу, воспеваем ти тако: Радуйся, благочестивых родителей дщерь честная; Радуйся, добродетели матери унаследовавшая; Радуйся, семи лет родителей лишившаяся; Радуйся, по матери своей за ночь стоя всю Псалтирь прочитавшая; Радуйся, любве ради ко Господу дом отеческий оставившая; Радуйся, людем труды своя приносившая; Радуйся, к учению школьному велие усердие имевшая; Радуйся, учение сие во благо себе обратившая; Радуйся, блаженная мати наша Алипие, на пажити Богоматери подвиги своя добре совершившая.

Кондак 3

Сила Вышняго от юности твоея воистину осеняше тя, храняше и возбуждаше на молитвы, пощение и милосердие, во еже подражати благочестивым родителем твоим и Господеви воспевати: Аллилуиа.

Икос 3

Имея тщание о подвизе жития равноангельнаго, потекла еси по всей стране нашей великой, обходя бо грады и веси, посещая обители и храмы ради поклонения святыням их. Проводяще житие странническое, навыкла о плоти своей нерадети, терпяще лишения и скудость в пище и одежде, верною спутницею Псалтирь Давидову с собою всегда имела еси и пением псалмов себе утешала еси. Мы же, видя таковую ревность молитвенную, вопием ти: Радуйся, в горняя со тщанием устремившаяся; Радуйся, суеты мирския отрешившаяся; Радуйся, всем сердцем Христа Бога возлюбившая; Радуйся, совершеннаго терпения исполненная; Радуйся, чистоты душевныя и телесныя хранительнице; Радуйся, яко от младенчества Господеви прилепилася еси; Радуйся, яко Господь Бог от юности освятити тя благоизволи; Радуйся, яко со страхом Божиим и усердием храму Божию и службам церковным прилежала еси; Радуйся, блаженная мати наша Алипие, на пажити Богоматери подвиги своя добре совершившая.

Кондак 4

Бурю бед, напастей и лютых гонений на церковь святую попусти Господь за грехи народа, отступившаго от веры отеческия и заповедей Господних не хранящаго. Многия верныя чада церкви за Христа лютыя страдания от безбожных властей претерпеша и мученическия смерти сподобишася, храняще любовь и верность Отечеству нашему Православному и Христу Богу поя: Аллилуиа.

Икос 4

Слышаще и видяще богоугодное житие твое, власти безбожныя заключиша тя, агницу непорочную, в темницу к разбойником в единей малой срачице на поругание и осквернение. Ты же, имея велие упование на Господа, в темнице безмолвно день целый на коленях стояла еси, от заключенных оскорбления, брань и биения претерпела еси и токмо усты непрестанно молитву Господу творила еси. Страж темничный, желая зрети поругание твое, узре велию славу твою: свет небесный озари главу твою. Он же приближися главою к главе твоей, хотяще, яко да и на него приидет сияние дивное сие. Видяще же посрамление свое страж жестокий устыдеся, возврати тебе одежды твоя и переведе тя в иную темницу. Мы же, видяще тя, храниму Богом, поем тебе тако: Радуйся, в темницу заключенная; Радуйся, в темнице той многия страсти понесшая; Радуйся, едину надежду и веру токмо на Бога полагавшая; Радуйся, Им Единым и Милостивым от поругания и осквернения сохраненная; Радуйся, многия заключенныя своим долготерпением удивившая; Радуйся, смирением своим люди, аки волки лютыя, укротившая; Радуйся, Апостолом Петром в темнице посещенная; Радуйся, Первоверховным Апостолом из темницы изведенная; Радуйся, блаженная мати наша Алипие, на пажити Богоматери подвиги своя добре совершившая.

Кондак 5

Божественный свет осия ризы твоя, егда из плена шедшую тя на пути люди злыя сретоша и аки вепри дивия устремишася на тя, хотяще зло ти сотворити. Ты же, аки голубица кроткая, слезне Царицу Небесную защитити тя молила еси и к стожку сена добежаше, спиною к нему прилепилася еси, желая укрытися. Люди же злыя вокруг стожка ходяще и невидяще тя, светом неземным одеянную, вельми яряся и браняся, отыдоша не причинив ти зла. Мы же, за таковую милость, Царице Небесней поем радостно: Аллилуиа.

Икос 5

Видяще и слышаще плач велий в доме церковнаго ктитора, во граде Чернигове, яко чадо их умре на печи от угара, мати наша милосердная, коленопреклоненную молитву ко Господу вознесла еси да возвратит душу отроковицы в тело. Окропила еси чадо святою водою и чадо оживе пред очима горько страждущих родителей, и тако скорбь их в радость обратила еси. Хотяще ктитор возблагодарити тя, проси остатися и жити в дому его. Ты же, не хотяще славы людския, тайно отошла в страну иную. Мы же, дивящеся чудесе твоему поем ти таковая: Радуйся, яко любовь велию к страждущим в сердце имевшая; Радуйся, сердцем своим скорбящих всех вельми утешавшая; Радуйся, дерзновенныя молитвы за них к Богу возносившая; Радуйся, яко молитвы твоя слыша Господь; Радуйся, молитвами твоими всех скорбящих утешавшая; Радуйся, скорби людей в радость претворявшая; Радуйся, славы земныя не искавшая; Радуйся, плоть свою трудами великими изнурявшая и благодать Духа Святаго стяжавшая; Радуйся, блаженная мати наша Алипие, на пажити Богоматери подвиги своя добре совершившая.

Кондак 6

Проповедует Богоугодное житие твое, всечестная наша мати, како подобает чтити Христа Бога нашего, Пречистую Матерь Его и святых угодников. Како надлежит любити храм Господень, хранити заповеди, соблюдати посты, поминати усопшия, любити ближния своя. Многая и преславная чудеса совершила еси действием и дарами Духа Святаго. Научи и нас пети благих Подателю Богу: Аллилуиа.

Икос 6

Возсия Богоугодное житие твое, яко светлая заря, призывающе всех на делание свое со усердием, да последуем тебе поя сицевая: Радуйся, научающая нас Христа Бога нашего чтити. Радуйся, научающая нас Богородицу всем сердцем возлюбити. Радуйся, научающая нас непрестанныя молитвы к Небу возносити. Радуйся, научающая нас всем святым поклонятися. Радуйся, научающая нас Храм Господень посещати. Радуйся, научающая нас не токмо ближния, но и обидящия нас любити. Радуйся, научающая нас скорби и болезни, напасти и обиды благодушно терпети и за все Бога благодарити. Радуйся, научающая нас благочестно житие наше проводити. Радуйся, блаженная мати наша Алипие, на пажити Богоматери подвиги своя добре совершившая.

Кондак 7

Хотя Человеколюбец Господь явити в тебе, преподобная Алипие, светильника нова, приведе тя во святый град Киев в Лавру Печерскую, идеже ты велиим пощением, столпничеством, коленопреклонением подвиги своя усугубила еси, непрестанно поя Господеви хвалебную песнь: Аллилуиа.

Икос 7

Новую видяще тя избранницу Божию, в духовныя чада прият тя наместник Лавры архимандрит Кронид. Отец духоносный, подвижник и постник, молитвенник и страстотерпец, на тесный путь спасения чадо свое благослови. Тем же и мы вопием ти таковая: Радуйся, отцем духовным возлюбленная; Радуйся, отца духовнаго возлюбившая; Радуйся, на тесный и скорбный путь жития земнаго им благословленная; Радуйся, послушная во всем отцу духовному; Радуйся, подвиг юродства о Христе по его благословению на ся вземшая; Радуйся, подвиг столпничества в Лавре Печерской понесшая; Радуйся, веригами, аки драгими ожерельями грудь свою украсившая; Радуйся, подвиги своими старцы лаврския удивившая; Радуйся, блаженная мати наша Алипие, на пажити Богоматери подвиги своя добре совершившая.

Кондак 8

Странно бе видети, како в немощнем телеси твоем сила Божия новаго человека в тебе созидаше. Духом Святым даровася тебе благодать зрети мысли людския, дарования откровений, пророчеств и исцелений. Кто возможет изрещи борения твоя с духами нечистыми, плотию и миром, от коего отрещися восхотела еси, ради непрестанного пения Богу: Аллилуиа.

Икос 8

Вся земная хваления тебе воспети по достоянию не возмогут духовная чада твоя, преподобная мати наша Алипие, видяще тя посреде бурь житейских миром их ограждавшую и о святей Церкви велие попечение имевшую. Хотяще уневестити тя Христу Богу нашему, духовный отец твой архимандрит Кронид постриже тя в ангельский чин в честь и память преподобнаго иконописца и чудотворца Печерскаго Алипия. Мы же, суетою помраченныя, радостно поем ти: Радуйся, ангельскаго чина сподобившаяся; Радуйся, постриг от руки отца духовнаго приемшая; Радуйся, в честь и память преподобнаго иконописца и чудотворца Алипия нареченная; Радуйся, живописанием подвигов земных своих преподобному Алипию уподобившаяся; Радуйся, николиже Лавру Печерскую не оставлявшая; Радуйся, за обитель свою коленопреклонно с воздетыми руками слезне молившаяся; Радуйся, дарования благодати Духа Святаго стяжавшая; Радуйся, свеща новая, в обители Царицы Небесной возжженная; Радуйся, блаженная мати наша Алипие, на пажити Богоматери подвиги своя добре совершившая.

Кондак 9

Все сердце твое содрогнуся, Богомудрая, егда безбожными властями великая святая Лавра Киево-Печерская в музей обратися. Коими словесы возможем изрещи скорбь твою, мати Алипие: умолкоша колокола, храмы закрышася, лампады угасоша, келлии опустеша, старцы и монахи в мир изыдоша. Никогоже обретеся пети в Лавре Богокрасную песнь: Аллилуиа.

Икос 9

Витии мудрии человеческими языки не возмогут изрещи велию скорбь сердца твоего, любвеобильная наша мати, егда изшедши в мир, искала еси себе пристанище и нигдеже обретала еси е. Многия скорби, поношения и гонения претерпевающе, непрестанно молила еси Царя Небеснаго, да не лишит тя жилища земнаго, идеже возможеши главу подклонити. Милосердный же Господь всели тя в пустыню Голосеевскую близ скита Лаврскаго, идеже многия старцы подвиги своя добре понесоша. Дивяся же таковому промышлению Божию о тебе мати Алипие, вопием ти: Радуйся, в пустыню близ скита Лаврскаго вселившаяся; Радуйся, своими молитвами пустыню разоренную облагоухавшая; Радуйся, Ангела-Хранителя Престола церкве разоренныя видевшая; Радуйся, кладбище пустынное посещавшая; Радуйся, преподобнаго Алексия Шепелева вельми чтившая; Радуйся, духовныя чада своя молитися к нему на могилку посылавшая; Радуйся, блаженному отцу нашему Феофилу равночестная; Радуйся, затворнику Досифею подобная; Радуйся, блаженная мати наша Алипие, на пажити Богоматери подвиги своя добре совершившая.

Кондак 10

Спасительнаго твоего подвига высоту обрела еси, многоскорбная наша мати, егда двери келлии своей отворила еси для людей, да внидут к тебе за утешением и исцелением вси скорбящии и болящии, грешнии и заблуждшии и ищущии пути спасения. Мы же, чтуще велию любовь твою к людем, Господеви поем: Аллилуиа.

Икос 10

Стена нерушимая, пристанище и отрада, утешение и веселие была еси, блаженная наша мати, всем к тебе прибегающим. Сего ради вопием ти: Радуйся, всеми благодатными даровании Духа Святаго людем послужившая; Радуйся, Духом Святым люди на святую истину наставлявшая; Радуйся, от неисцельных болезней мастию, тобою составленней люди исцелявшая; Радуйся, яко пища у тебе чудесно умножашеся; Радуйся, яко пища твоя лекарством бываше; Радуйся, плененныя люди за ограду выводившая и тем их спасавшая; Радуйся, за их спасение себе ключики на шею надевавшая; Радуйся, из ключиков тех веригами, аки жемчугом бесценным, себе украсившая; Радуйся, блаженная мати наша Алипие, на пажити Богоматери подвиги своя добре совершившая.

Кондак 11

Пение и святыя молитвы непрестанно возносила еси Пресвятей Троице, Иисусу Сладчайшему, Пречистей Богородице и всем святым, блаженная Алипие и всем житием твоим подвижница благочестивая явилася еси,прозорливая и преизрядная. Светильник свой, ярко возжженный, высоко держаше через все житие неугасимым пронесла еси. Мы же, благодаряще Господа за таковую милость к нам, поем согласно: Аллилуиа.

Икос 11

Светоподательным светильником явилася еси, Алипие блаженная, всем с верою к тебе приходящим. Благочестно живущим была еси опора крепкая. Священником и монашествующим была еси наставнице изрядная. Во тьме грехов погрязшим, заблуждшим и от пути истиннаго отклонившимся — вразумление кроткое. Мы же разумеюще любовь сию великую ублажаем тя тако: Радуйся, на святыя иконы крепко молившаяся; Радуйся, от святых икон благословение получавшая; Радуйся, многия советы полезныя дававшая; Радуйся, от судов неправедных избавлявшая; Радуйся, в темнице заключенным ослабу подававшая; Радуйся, в трудных делех помощнице; Радуйся, на воинской службе состоявших крепкая защитнице; Радуйся, путешествующих от внезапныя смерти избавлявшая; Радуйся, блаженная мати наша Алипие, на пажити Богоматери подвиги своя добре совершившая.

Кондак 12

Благодать и велие твое дерзновение пред Богом ведуще, молимся тебе тепле: моли Господа, да сохранит Церковь Свою святую и избавит Ю от расколов и ересей, власти умудрит, гордыя и дерзкия смирит, заблуждшия и отпавшия от веры отеческия в лоно Матери-Церкви возвратит, от войн, нестроений и глада избавит. Да подаст земле плодородие, воздуху благорастворение, пастырем еже в вере Православней крепкое стояние и дерзновение, да поем тобою благодеющему нам Богу: Аллилуиа.

Икос 12

Поюще твое прославление, ублажаем тя, преподобная, яко многомощную о нас молитвенницу, утешительницу, покровительницу и с любовию возглашаем ти сице: Радуйся, посещения Матери Божией сподобившаяся; Радуйся, Царицу Небесную телесными очами лицезревшая; Радуйся, чада твоя Царице Небесней вручившая; Радуйся, всеми преподобными Печерскими хранимая; Радуйся, многия святыя грядущия на облацех зревшая; Радуйся, кончину свою за год предсказавшая; Радуйся, мирныя и тихия кончины в день воскресный сподобившаяся; Радуйся, Благоуханием от книги блаженнаго Феофила о кончине своей чаду своему возвестившая; Радуйся, из дальних стран на погребение свое чада дивно собравшая и многия чудеса явившая; Радуйся, блаженная мати наша Алипие, на пажити Богоматери подвиги своя добре совершившая.

Кондак 13

О преподобная и блаженная мати наша Алипие! Приими малое сие наше моление в похвалу тебе возносимое, моли Господа нашего Иисуса Христа и Матерь Его Пресвятую Богородицу даровати православным христианом на враги победы и одоление, миру умирение, земли нашей утверждение; нам же грехов оставление, жития исправление, да тако наследницы Царствия Небеснаго будем, со ангелы Богу поюще: Аллилуиа.

Молитва

О преблаженная и всечестная наша мати Алипие, Лавры Киево-Печерския похвало, красото и радование, великая о нас молитвеннице, усердно к тебе прибегаем и с сокрушенным сердцем просим: моли Спасителя нашего Господа Иисуса Христа и Пресвятую Владычицу нашу Богородицу во еже избавитися нам от многоразличных духовных и плотских недугов, болезней. Да подаст нам Господь прощение согрешений наших и стяжати благодать Духа Святаго, Господа Животворящаго, во вспоможение брани на невидимыя и видимыя враги наша.

О таиннице чудная! Простри молитву твою к Престолу Всевышняго, да избавит нас Владыка мира от ада преисподняго, от волков мысленных, многоразличных зол и бед.

О преподобная мати Алипие, и по смерти не остави чада твоя, от всех концев страны тобою собранныя, и избави я от всякого навета вражия. Ум наш озари светом лица Божия, укрепи благодатию Господнею жизнь нашу, да в законе Его утвердившеся, неленостно пойдем по пути заповедей святых. Осени своим матерним благословением нас всех в скорбех и печалех сущих, болезнями душевными и телесными одержимых. Испроси нам свыше дух кротости, терпения и любве, мудрости и покаяния. Отступившия от Православныя веры и погибельными ересьми и расколами ослепленныя вразуми. В супружестве живущим буди любве и мира подательнице, младенцем крепкое и доброе возрастание, отроком и отроковицам в учении помощница и ума прибавление. Юным - наставнице и надежная хранительнице чистоты и целомудрия. Старым сединам - добрая опора и мудрость. Странствующим - от внезапныя смерти избавление. В темницех заключенным — скорое от уз разрешение. Да низпослет нам Господь твоими молитвами, мати Алипие, труд полезный по сердцу нашему. В житейских делех буди нам мудрая советодательнице. Жилищам нашим хранительнице крепкая и надежная. Нищим и неимущим - щедрая и богатая милостыни подательнице. Всем нам крепко веру Православную хранити, в любви друг ко другу пребывати, память твою чтити и за все Бога хвалити ныне и присно и во веки веков. Аминь.


Главная страница сайта Печать страницы Ответ на вопрос Пожертвования YouTube канал отца Олега Вниз страницы Вверх страницы К предыдущей странице   К вышестоящей странице   К следующей странице Перевод
Код баннера
Сайт отца Олега (Моленко)

 
© 2000-2024 Церковь Иоанна Богослова